Xalqaro ekspertlik va strategik hamkorlikni kengaytirish doirasida 7-sentabr kuni Fransiyaning Iqtisodiy hamkorlik va taraqqiyot tashkiloti (OECD / IHTT) delegatsiyasi O’zbekiston Respublikasi Yoshlar ishlari agentligi huzuridagi Yoshlar muammolarini o’rganish va istiqbolli kadrlarni tayyorlash institutiga tashrif buyurdi.

Delegatsiya tarkibidan OECDning davlat boshqaruvi va hamkorlik bo’yicha yetakchi ekspertlari Nizar Tuxami-Shahdi (Nizar Touhami Chahdi) hamda Nikol Dryu (Nicole Drew) o’rin oldi.

Tashrif maqsadi va asosiy yo’nalishlar

Tashrif davomida mehmonlar institut faoliyati, bu yerda olib borilayotgan ilmiy-analitik ishlar va amalga oshirilayotgan istiqbolli loyihalar bilan atroflicha tanishdilar.
Uchrashuvning asosiy mavzusi Institut hamda OECD hamkorligida amalga oshirilayotgan amaldagi qo’shma loyihalar, xususan, «Yoshlar siyosati tahlili» (Youth Policy Analysis) loyihasi va yoshlarni qo’llab-quvvatlashning institutsional mexanizmlarini takomillashtirishga qaratilgan boshqa tashabbuslarni taqdim etish va muhokama qilishdan iborat bo’ldi.

Muhokama qilingan masalalar

Muzokaralar davomida Institut vakillari OECD ekspertlariga respublika kesimida yoshlar bo’yicha yig’ilayotgan tahliliy ma’lumotlar hamda ushbu ma’lumotlarni aniq boshqaruv qarorlariga aylantirish mexanizmlarini namoyish etdilar.
OECD vakillari Institutning yoshlar siyosatini ilmiy-tahliliy jihatdan ta’minlash borasidagi tizimli ishlariga yuqori baho berib, hamkorlikni yanada chuqurlashtirish, ilg’or xalqaro tajriba almashish va qo’shma tadqiqot dasturlarini amalga oshirishga tayyor ekanliklarini bildirdilar.